愛犬（上）
又一隻狗嘅屍體，擺喺我面前。
狗主楊太泣不成聲：「點解會咁㗎？我明明好錫旺財，佢點解會餓死？」
無錯，睇旺財枯瘦嘅屍體，佢的確係餓死嘅。
主人好錫隻狗，隻狗點解會餓死呢？
呢個就要從狗嘅構造講起，好多人都想養狗，但因為種種困難未能成事。
其中一個最大嘅困難，肯定係狗嘅排洩，又怕佢喺屋企隨處大小便，有時又唔方便帶佢出街。
仲有，有啲人要定期出差，怕出差時餵唔到狗；餵狗時又驚佢食錯嘢，唔知邊種狗糧更好……
總之，「吃喝拉撒」構成咗養寵物嘅主要困難。
我作為科學家，就開展咗一個叫「愛犬」嘅計劃，以基因改造寵物狗為目標。
基因改造後嘅「愛犬」，係無消化系統嘅，即係唔駛食嘢，亦唔會排洩。
但生物都需要能量，「愛犬」嘅能量就係「愛」。
愛犬會將第一個摸佢個頭嘅人，定性為「主人」，並產生「愛之連接」。
從此，主人只要愛隻狗，狗就會得到充足嘅能量，好似食飽飯咁。
但如果主人唔愛佢，佢就會餓，由於佢體內無消化系統，所以佢都無辦法通過正常嘅食物獲得營養。
即係話，唔夠愛嘅「愛犬」，就會餓死。
喺「愛犬」推出市場前，我先搵咗一班有意養狗嘅人嚟參與實驗。
我三令五申，強調養呢種狗，雖然生活上會少好多麻煩，但佢哋係需要「愛」。
狗主都紛紛承諾，自己會全心全意咁愛「愛犬」。
但無幾耐，「愛犬」陸續死亡，旺財係第三十二隻餓死嘅「愛犬」。
我問張太：「你有無好好愛旺財？」
「我梗係愛旺財啦，我唔愛佢做咩要養佢？我對佢好過對自己個仔啊。」張太強調。
為咗收集更多資料，我去咗張太屋企視察。
如張太所言，屋內有一個精緻嘅狗窩，同埋好多狗玩具。
睇得出，旺財生前應該成日有玩具玩。
張太仲畀咗好多影片同相我睇，全部都係佢帶旺財去玩嘅記錄。
影片中嘅旺財非常活潑，笑得燦爛，到處遊山玩水。
張太問我：「你覺得我愛唔愛旺財？你覺得我仲可以點做？」
從呢啲證據上睇，張太似乎都盡力愛護旺財。
張太繼續講：「愛一隻狗，除咗買嘢食，就係帶佢周圍去玩，同買玩具畀佢玩，我都做齊晒啦。你仲想我點？」
我一時語塞。
張太就責怪我：「你嗰啲基因改造狗，係咪唔得㗎？一隻狗唔食嘢，點會唔死？」
我當然有辯解，但我講複雜嘅科學理論，張太又聽唔明，最後張太只回以我一個鄙視嘅眼神。
我唔介意被張太鄙視，我介意嘅係，實驗又一次失敗。
而且，之前嗰三十一隻「愛犬」，情況都同旺財差唔多，都係主人強調自己好愛隻狗，但隻狗餓死咗。
到底出咗咩問題？係基因改造上有問題，定係參與實驗嘅狗主有問題？
返到屋企，我無意中見到張入數紙。
我隨口問：「老婆，你上網買嘢啊？」
「唔係買嘢，我呢排識咗個狗義工，佢姓趙，專門照顧啲無人要嘅流浪狗，我都想幫吓手，咪捐咗少少錢。」老婆答。
我突然諗起，之前參與實驗嘅狗主，都知道「愛犬」係基因改造狗，知道自己要愛佢。
會唔會係太刻意嘅愛，提供唔到足夠嘅能量？
下集：https://bit.ly/2ZJyo93
將專頁設定為「搶先看」/ "See first"，最新故仔馬上睇！
龜兔賽跑之後：https://goo.gl/5wMsvh
我嘅職業係：灶神：http://bit.do/fcUgL
#短故 #短篇 #小說 #陳美濤 #廣東話 #粵語 #tomatochan #愛犬
Search